Moskvada Türkiyənin xarici işlər naziri Hakan Fidan ilə Rusiya Təhlükəsizlik Şurasının (TŞ) katibi Sergey Şoyqu arasında görüş keçirilib. 

Senzor.az bildirir ki, Türkiyə Xarici İşlər Nazirliyinin X sosial şəbəkəsindəki hesabında yer alan mesajda belə deyilir.

"Nazir Hakan Fidan Moskvada Rusiya Təhlükəsizlik Şurasının katibi Sergey Şoyqu ilə görüş keçirib", - mesajda bildirilib.

Rusiya Federasiyası Təhlükəsizlik Şurası mətbuat xidmətinin məlumatına görə, görüş zamanı ikitərəfli və çoxtərəfli formatda təhlükəsizlik sahəsində Rusiya-Türkiyə əməkdaşlığı məsələləri müzakirə edilib. “Beynəlxalq və regional təhlükəsizliyin möhkəmləndirilməsi də daxil olmaqla, strateji bərabərhüquqlu ikitərəfli tərəfdaşlığın inkişafına sadiqlik təsdiqləndi”, - mesajda deyilir.

Məlumata görə, Şoyqu “təhlükəsizlik şuraları vasitəsilə Rusiya-Türkiyə əlaqələrini qurmağa” hazır olduğunu bildirib.

Hakan Fidan Moskvaya səfəri çərçivəsində Rusiya Xarici Kəşfiyyat Xidmətinin (SVR) rəhbəri Sergey Narışkinlə də görüşüb. Bu barədə Türkiyə Xarici İşlər Nazirliyindəki diplomatik mənbələr məlumat yayıb.

Bundan əlavə, Türkiyə Xarici İşlər Nazirliyinin rəhbəri Rusiya-Türkiyə Sahibkarlar Dərnəyinin (RTAP) təşkil etdiyi tədbirdə iştirak edib. Bu barədə Türkiyə diplomatik idarəsinin X sosial şəbəkəsindəki mesajında deyilir.

Senzor.az