Ukrayna Prezidenti Volodimir Zelenski ölkəni tərk edən və ya getməyi planlaşdıran bütün dövlət qulluqçularına müraciət edərək, onları 24 saat ərzində geri qayıtmağa çağırıb, çünki xalq onlara “ölkəni idarə etməyi və onu qorumağı” əmanət edib.Senzor.az bildirir ki, V.Zelenski Teleqram kanalında yayımladığı videomüraciətdə deyib: "Mən ölkəni tərk etmiş və ya yaxın gələcəkdə bunu etməyi planlaşdıran bütün dövlət nümayəndələrinə, dövlət qulluqçularına, bütün səviyyələrdə olan xalq deputatlarına müraciət edirəm: Ukrayna xalqı sizə təkcə dövləti idarə etməyi deyil, həm də onu qorumağı etibar edib, belə bir vəziyyətdə "bizimlə, Ukrayna xalqı ilə birlikdə olmaq sizin birbaşa borcunuzdur. İndi sizi 24 saat ərzində Vətənə qayıtmağa və Ukrayna ordusu ilə, diplomatiyamızla, xalqımızla birlikdə çiyin-çiyinə dayanmağa dəvət edirəm”.
V.Zelenski eyni zamanda daha əvvəl Ukraynanı tərk etmiş oliqarxlara müraciət edib. O bildirib ki, bu gün hər kəs Ukrayna vətəndaşı kimi sınaqdan keçirilir. Prezident iş adamlarını belə bir sınaqdan ləyaqətlə keçməyə çağırıb.
"Sizin gücünüz pulunuzda, təyyarələrdə deyil, göstərə biləcəyiniz vətəndaş mövqeyindədir. Xalqınıza və ölkənizə qayıdın, hansıların ki, sayəsində fabriklər aldınız, sərvətlər topladınız", - dövlət başçısı əlavə edib.
Volodimir Zelenski həmçinin ölkə mediasına müraciət edərək, onları ölkədən qaçan sahibləri üçün deyil, Ukrayna üçün işləməyə çağırıb.
Prezident deyib ki, əks halda dövlət, rəhbərlik ciddi tədbirlər görəcək.
Dövlət başçısı həmçinin bildirib ki, Ukraynanı böyük müharibə ilə qorxudur, bir daha işğal tarixini təyin edirlər və bu, birinci dəfə deyil. Lakin Ukrayna liderinin sözlərinə görə, “dövlət bu gün həmişəkindən daha güclüdür”.
“Avropanın və bütün qitənin təhlükəsizliyi Ukraynadan, ordumuzdan asılıdır. Biz sülhə çalışırıq və bütün məsələləri yalnız danışıqlar yolu ilə həll etmək istəyirik. Həm Donbas, həm də Krım Ukraynaya qayıdacaq. Biz onları geri qaytaracağıq”, - deyə V.Zelenski vurğulayıb.
V.Zelenski onu da əlavə edib ki, fevralın 16-da Ukraynada “Milli Birlik Günü”nün qeyd edilməsi haqda fərman imzalayıb.
