Martın 7-nə keçən gecə Rusiya ordusu Ukraynanın Xarkov şəhərinə hava zərbələri endirib.

Senzor.az yerli KİV-ə istinadən bildirir ki, Ukraynanın Fövqəladə Hallar üzrə Dövlət Xidmətinin verdiyi məlumata görə, Xarkova endirilən raket və dron zərbələri nəticəsində beşmərtəbəli binanın bir hissəsi dağılıb. Xilasedicilər beşmərtəbəli binanın dağıntıları altından 5 nəfərin cəsədini çıxarıblar.

Axtarış-xilasetmə əməliyyatları davam edir, 300 kvadratmetrlik ərazidə yanğının söndürülməsi işləri də aparılır. Hadisə yerində Xarkov və Dövlət Fövqəladə Hallar Xidmətinin digər qarnizonlarından olan bölmələr, o cümlədən bomba zərərsizləşdirmə mütəxəssisləri, it baxıcıları və psixoloqlar işləyir.

Dağıntılar altında hələ də insanlar ola bilər.

Xarkov vilayət Hərbi Administrasiyasının rəhbəri Oleq Sinegubovun verdiyi məlumata görə, şəhərə edilən hava hücumu zamanı 10 nəfər yaralanıb, onlardan 3-ü uşaqdır.