Ermənistanın Baş naziri Nikol Paşinyan bir neçə gün əvvəl Gümrüyə səfəri zamanı keçmiş həyat yoldaşı Anna Akopyanla görüntülənməsinə münasibət bildirib.
“Sputnik Ermənistan” xəbər verir ki, Paşinyan bu barədə jurnalistlərin suallarını cavablandırarkən danışıb.
Belə ki, cütlüyün yenidən bir araya gəlib-gəlmədiyi ilə bağlı suala cavab verən Paşinyan bundan əvvəl Akopyanın qərarını şərh etdiyini, lakin bunun həyat yoldaşının qərarı ilə razılaşdığı anlamına gəlmədiyini bildirib.
Bununla yanaşı, Paşinyan Anna ilə yenidən bir araya gəlmək üçün səylər göstərdiyini və belə bir şansın yarandığından məmnun olduğunu vurğulayıb.
Xatırladaq ki, fevralın sonunda uzun illər vətəndaş nikahında yaşayan N.Paşinyanla A.Akopyanın ayrıldığı məlum olub. Ermənistanın “Hraparak” qəzeti cütlüyün rəsmi ayrılığına illərlə davam edən gərgin münasibətlərin səbəb olduğunu yazıb.
