Erməni iş adamı və “Güclü Ermənistan” partiyasının lideri Samvel Karapetyan Ermənistan parlamentinin sədri Alen Simonyana qarşı məhkəmə iddiası qaldırıb.
Senzor.az erməni KİV-ə istinadən bildirir ki, Karapetyan spikerdən onun ünvanına səsləndirilmiş şərəf və ləyaqəti ləkələyən yalan məlumatların təkzib edilməsini və 6 milyon dram (təxminən 16 min ABŞ dolları) məbləğində mənəvi təzminat ödənilməsini tələb edir.
İddia sənədinə görə, Karapetyanın müdafiə tərəfi Simonyanın 19 may 2026-cı ildə sosial şəbəkələrdə etdiyi açıqlamaların yalan və müvəkkillərinin işgüzar nüfuzuna sarsıdıcı zərbə vurduğunu bildirərək onların rəsmi şəkildə, özü də spikerin Facebook və TikTok səhifələrində əlavə şərhlər olmadan və orijinal nəşrlə eyni görünürlükdə, təkzib olunmasını istəyir. Bundan əlavə, məhkəmə xərclərinin də cavabdeh tərəfindən ödənilməsi tələb olunur.
Yeri gəlmişkən, S.Karapetyan bundan əvvəl Ermənistan Baş naziri Nikol Paşinyanın “Vətəndaş Müqaviləsi” partiyası və İctimai Televiziyaya qarşı da oxşar iddialarla məhkəməyə müraciət etmişdi.
