ABŞ-da keçirilən futbol üzrə dünya çempionatının G qrupunda III turun oyununda Belçika Yeni Zelandiya ilə üz-üzə gəlib.
Senzor.az bildirir ki, “BC Place” stadionunda keçirilən qarşılaşma avropalıların 5:1 hesablı üstünlüyü ilə başa çatıb.
Belçikanın heyətində Leandro Trossard dubla imza ataraq 28-ci və 50-ci dəqiqələrdə fərqlənib. Digər qolları Kevin De Brüyne (66), Romelu Lukaku (86) və Aleksis Salemakers (90+4) vurublar.
Yeni Zelandiyanın yeganə qolunu isə 84-cü dəqiqədə Cast Elaydca vurub.
G qrupunun III turunun digər oyununda Misir və İran qarşılaşıblar.
Sietldə keçirilən matç 1:1 hesablı heç-heçə ilə başa çatıb.
Beləliklə, qrup lideri Belçikanın ardınca Misir də növbəti mərhələyə adlayıb. Bu nəticə Misir üçün xüsusilə əlamətdardır və tarixi əhəmiyyət daşıyır. Belə ki, Afrika təmsilçisi xallarını 5-ə yüksəldərək dünya çempionatları tarixində ilk dəfə pley-off mərhələsinə vəsiqə qazanıb. Misirin növbəti mərhələdəki rəqibi Avstraliya millisi olacaq.
Üç oyunda 3 xal toplayan və qrup 3-cüsü olan İrana gəlincə, o və daha 7 komanda hələlik gözləyir. Yəni pley-offa vəsiqə qazanmaq üçün hələ şans var.
