“Donetsk vilayətinin Mariupol şəhərinin müdafiəçilərinə canlarını xilas etmək əmri verilib”.Unian.net bildirir ki, bunu Ukraynanın müdafiə naziri Aleksey Reznikov deyib.
“Bu gün çox mürəkkəb və mühüm proseslər gedir, o cümlədən Qırmızı Xaç təşkilatının köməyi ilə danışıqlar aparılır. Nəticədə bu, son dərəcə ağır vəziyyətdə olan yaralıların təxliyyəsidir. Bizim planımız onları xilas etməkdir, azadlıq haqqında isə sonra düşünmək olar”, – deyə nazir vurğulayıb.
O qeyd edib ki, 20 minə qədər rus işğalçısından ibarət qrupların saxlanılması və onların Zaporojyeyə, daha sonra Donbasa buraxılmaması, o cümlədən qoşunların Kiyevdən uzaqlaşdırılması əmri yerinə yetirilib, buna görə də şəhərin bütün müdafiəçiləri qəhrəmandırlar.
“Onların indi yeni əmri var - canlarını xilas etmək. Ukraynanın onlara ehtiyacı var. Əsas olan odur”, – deyə müdafiə naziri bəyan edib.
Xatırladaq ki, mayın 16-da blokadaya alınmış “Azovstal” zavodundan Mariupol müdafiəçilərinin təxliyəsi başlayıb. Prezident Volodimir Zelenski axşam müraciətində hərbçilərin “Azovstal”dan xilas edildiyini açıqlayıb.
