“Ukraynada Rusiyanın daha bir generalı yaralanıb”. 

Senzor.az bildirir ki, xarici KİV-də bu barədə xeyli material yayımlanıb. Söhbət Rusiya Cənub Hərbi Dairəsi komandanının müavini, Rusiyanın Qarabağdakı sülhməramlı kontingentinin keçmiş komandanı general-leytenant Rüstəm Muradovdan gedir.

İddia olunur ki, general ağır yaralanıb, bacısı oğlu Salman Süleymanov isə öldürülüb.

Məlumata görə, 27 yaşlı S.Süleymanov tağım komandiri olub. O, yanvarın əvvəlində Ukrayna ilə sərhədə aparılıbmış. Aprelin sonunda isə gərgin döyüşlər zamanı öldürülüb. R.Muradovun özü Ukraynada yaralanandan sonra hospitala yerləşdirilib. O, bacısı oğlunun ölüm xəbərini də elə hospitalda eşidib. General xahiş edibmiş ki, “heç olmasa bir sümük də olsa tapılsın ki, qohumu dəfn olunsun...”.

Bildirilir ki, artıq Salman Süleymanovun nəşi tapılaraq doğulduğu Dağıstana aparılıb...

Qeyd edək ki, bu xəbər Azərbaycan KİV-lərində də tirajlanıb. Və bir az əvvəl general-leytenant Rüstəm Muradov telefonla rusdilli haqqin.az saytı ilə əlaqə saxlayaraq bacısı oğlunun Ukraynada ölməsi ilə bağlı məlumatı təsdiqləyib. Amma Ukraynadakı döyüşlər zamanı özünün xəsarət alması ilə bağlı xəbəri təkzib edib.

Xatırladaq ki, Rüstəm Muradov 2022-ci ilin fevralına qədər Azərbaycanın Qarabağ bölgəsində müvəqqəti yerləşdirilmiş sülhməramlı kontingentə rəhbərlik edib.