İranın "İslam İnqilabı Keşikçiləri Korpusu" (SEPAH) və İran ordusu "strateji obyektləri müdafiə etmək" üçün birgə hava təlimləri keçirirlər.Hərbi təlim bu gündən etibarən iki gün davam edəcək və təlimdə İran Ordusunun Hərbi Hava, Hava Hücumundan Müdafiə Qüvvələri və İslam İnqilabı Keşikçiləri Korpusunun Hərbi Hava Qüvvələri iştirak edir.
SEPAH-a bağlı "Xatəm-əl-Ənbiya" Birgə Hava Hücumundan Müdafiə Qərargahının komandanı, briqada generalı Qadir Rəhimzadə birgə ixtisaslaşdırılmış hava hücumundan müdafiə təliminin əməliyyat mərhələsinin ölkənin mərkəzi səhralıq (kəvir) bölgəsində keçiriləcəyini bildirib.
Keçirilən hava təlimi "Vilayət səmasının müdafiəçiləri-1400" adlanır və İran hərbi rəsmilərinə görə, təlimdə pilotsuz təyyarələrdən istifadə ediləcək.
General Rəhimzadə təlimin keçirilməsi məqsədlərindən birinin İranın "həssas və həyati əhəmiyyətli mərkəzlərinin müdafiə edilməsi" kimi dəyərləndirib.
İranın nüvə obyektlərinin və atom mərkəzlərinin əksəriyyəti ölkənin mərkəzi bölgələrində, əsasən "İsfahan və Mərkəzi" əyalətlərində yerləşir.İranın son vaxtlar ardıcıl hərbi təlimlər və manevr keçirməsi ilə eyni vaxtda, Azərbaycan Müdafiə Nazirliyi də bu gündən başlayaraq oktyabrın 11-də Bakı bölgəsində istehsalat və enerji təchizatı infrastrukturunun qorunması məqsədilə iki günlük hərbi təlim keçirəcəyini açıqlayıb.
Milli.az xatırladır ki, İran son həftələrdə Azərbaycanla sərhədi yaxınlığında daha bir hərbi təlim keçirib.
