İran Prezidenti İbrahim Rəisi bu gün Tehranda olan Türkiyənin xarici işlər naziri Mövlud Çavuşoğlunu qəbul edib.Senzor.az yerli KİV-ə istinadən bildirir ki, bu barədə M.Çavuşoğlu özü “Tvitter”də yazıb.
“Prezident Rəisi ilə ticarət, investisiyalar və terrorizmlə mübarizə də daxil olmaqla ikitərəfli əlaqələrimizi, o cümlədən regionumuzda baş verən son hadisələri müzakirə etdik. Əlaqələrimizi daha da inkişaf etdirmək üçün qarşılıqlı iradəmizi bir daha təsdiqlədik", - deyə nazir bildirib.
Qeyd edək ki, Mövlud Çavuşoğlu Prezident İbrahim Rəisi ilə görüşdən əvvəl - səhər saatlarında iranlı həmkarı Hüseyn Əmir-Abdollahian ilə görüşmüşdü.
Xarici işlər nazirlərinin görüşündən sonra ortaq mətbuat konfransı keçirilmiş və Hüseyn Əmir-Abdollahian bildirmişdi ki, tərəflər gələcək uzunmüddətli ikitərəfli əməkdaşlıq üçün yol xəritəsinin cızılması barədə razılığa gəliblər.
