İsrail hakimiyyəti İrandan gələn hücum təhlükəsi ilə bağlı bağlanan hava məkanını açıb.
Senzor.az bildirir ki, bu barədə İsrail Hava Limanları İdarəsi məlumat yayıb.
“Təhlükəsizlik xidmətlərinin göstərişinə əsasən, səhər saat 07:30-dan (Bakı vaxtilə 08:30) etibarən İsrail Dövlətinin hava məkanı açılıb, Ben Qurion hava limanı fəaliyyətini bərpa edib”, - məlumatda deyilir.
Bundan başqa, İsrail Müdafiə Ordusunun komandanlığı İrandan raket və pilotsuz təyyarələrin kütləvi hücumundan sonra sakinlərə sığınacaqları tərk etməyə icazə verib.
"Times of Israel" qəzetinin yazdığına görə, hərbçilər qeyd ediblər ki, mülki vətəndaşların artıq mühafizə olunan yerlərdə olmasına ehtiyac duyulmur.
Eyni zamanda, hər hansı kütləvi və maarifləndirici tədbirlərə məhdudiyyətlərin hələ də qüvvədə olduğu bildirilir.
Bundan əvvəl İsrail Müdafiə Qüvvələrinin mətbuat xidməti bildirmişdi ki, İran öz ərazisindən İsrailə doğru pilotsuz təyyarələr atıb. Ordu yüksək hazırlıq vəziyyətindədir və bütün hədəfləri izləyir. Daha sonra İsrail ordusu İrandan raket buraxılışlarını da qeydə aldığını bəyan etmişdi…
Senzor.az
