Ermənistan-ABŞ şirkəti Sünikdən keçən yola nəzarət etməyəcək, onu idarə edəcək.

Senzor.az yerli KİV-ə istinadən bildirir ki, bunu Ermənistanın Baş naziri Nikol Paşinyan deyib.

Onun sözlərinə görə, bu marşrutda biznes idarəetməsi həyata keçiriləcək.

Baş nazir ABŞ-ın nəzarəti altında olacaq yoldan İran yük maşınlarının keçməsi ehtimalı ilə bağlı məsələyə də münasibət bildirib və hazırda Ermənistanın digər ərazilərində Rusiyanın konsessiya əsasında idarə etdiyi dəmir yoluna dair təcrübəni xatırladıb.

O, dəmir yolunun bir çox erməni yaşayış məntəqələrindən keçdiyini və bu şəraitdə nə Gürcüstan, nə də İran maşınlarının oradan keçərkən heç bir problemlə qarşılaşmadığını vurğulayıb.

N.Paşinyan onu da qeyd edib ki, Ermənistan nəzarət-buraxılış məntəqələrində yoxlama prosedurlarını sadələşdirəcək: "Biz təkcə Ermənistan-Azərbaycan sərhəd məntəqələrində deyil, həm də bütün sərhəd məntəqələrimizdə sadələşdirmələrə gedəcəyik ki, biznes mühitini - ixrac, idxal, tranziti mümkün qədər sadələşdirək. Bu, istənilən halda biznesin aparılması üçün ən münasib və vacib mühitdir".