ABŞ və İran arasında keçirilən müzakirələrdə bir məqam artıq tam aydındır: İran danışıqlara zəif tərəf kimi deyil, əksinə, özünü güclü hiss edən tərəf kimi daxil olub. Məhz bu səbəbdən rəsmi Tehran müzakirələr zamanı heç bir əhəmiyyətli geri çəkilməyə və ya güzəştə razı olmayıb.

“Teleqraf” xəbər verir ki, bu barədə İsrail Ordusunun (SAXAL) Hərbi Kəşfiyyat İdarəsinin İran masası üzrə keçmiş rəhbəri Denni Sitrinoviç bildirib.

Analitikin fikrincə, Vaşinqtonda İranın kifayət qədər zəiflədiyi barədə yanlış bir təsəvvür formalaşmışdı. ABŞ rəhbərliyi hesab edirdi ki, uranın zənginləşdirilməsi və Hürmüz boğazı ilə bağlı öz sərt tələblərini Tehrana asanlıqla diktə edə biləcək. Lakin proseslər bu gözləntilərin reallıqdan uzaq olduğunu sübut etdi.

Hazırda ABŞ-ın qarşısında dayanan ən böyük problem ondan ibarətdir ki, şiddətli hərbi toqquşmalara qayıdış İranın mütləq şəkildə təslim olması ilə nəticələnməyəcək. Ekspert xəbərdarlıq edir ki, hərbi gərginliyin artması müharibənin coğrafi miqyasını kəskin şəkildə genişləndirə və qlobal iqtisadiyyata sarsıdıcı zərbə vura bilər.

Denni Sitrinoviç vurğulayıb ki, ABŞ Prezidenti Donald Tramp indi üç ağır seçimdən birini etmək məcburiyyətindədir:

Danışıqları davam etdirmək;

Qarşıdurmanı heç bir razılaşma əldə etmədən bitirmək;

Hərbi gərginliyi artırmaq (eskalasiya).

Ekspertin qənaətinə görə, hətta İranın infrastrukturuna zərbələr endirmək və ya strateji adaların işğalı kimi addımlar Tehran üçün ağrılı olsa da, bu, bölgə ölkələrinə, İsrailə və ABŞ-ın özünə baha başa gələcək şiddətli reaksiyaya səbəb olacaq. Üstəlik, bütün bu hərbi təzyiq vasitələrinin İranın fundamental mövqeyini dəyişəcəyi ehtimalı olduqca aşağıdır.