Ermənistanda keçirilən parlament seçkilərində səsvermə başa çatıb.
Senzor.az yerli KİV-ə istinadən bildirir ki, saat 20:00-a olan məlumata görə, seçicilərin 58,97 faizi və ya 1 milyon 476 min 597 nəfəri səsvermədə iştirak edib.
Yeri gəlmişkən, Ermənistan mətbuatının məlumatına görə, 2021-ci ilin iyun ayında keçirilən əvvəlki parlament seçkilərində seçici fəallığı 49,4 faiz olub.
Seçkilərdə ümumilikdə 18 siyasi qüvvə - iki blok və 16 partiya iştirak edib. Parlamentə düşmək üçün partiyalara 4 %, bloklara isə 8 % (iki partiyaya qədər) və 10 % (ikidən çox partiya) hədd müəyyən edilib. Seçici iştirakı üçün hədd nəzərdə tutulmayıb.
Ermənistandakı parlament seçkilərini ATƏT/DTİHB-dən 328 və MDB-dən 120 müşahidəçi olmaqla 647 beynəlxalq müşahidəçi, eləcə də 13 yerli vətəndaş nəzarət təşkilatından 2 600-dən çox müşahidəçi izləyib. Seçkiləri işıqlandırmaq üçün akkreditasiya üçün cəmi 181 xarici və 71 yerli media orqanı müraciət edib.
