AKP-nin etirazı ilə CHP namizədinin qalib gəldiyi Ərdahanda seçkilər təkrarlanacaq.
Bu barədə “TRT Haber” məlumat yayıb.
Belə ki, AKP-nin şəhər təşkilatı bütün bülletenlərin yenidən sayılması və seçkinin ləğvi üçün Mərkəz Rayon Seçki Şurasına etiraz edib. Şura AKP-nin ərizə ilə təqdim etdiyi dəlillərə əsaslanaraq, səs çoxluğu ilə seçkilərin yenilənməsinə qərar verib. Səsvermə iyunun 2-də keçiriləcək.
Qeyd edək ki, Türkiyədə martın 31-i yerli özünüidarəetmə orqanlarına seçkilər keçirilib. Ərdahanda CHP-nin namizədi Faruk Dəmir 45,06%, AKP namizədi Yunus Baydar isə 43,51% səs toplayıb. İki namizəd arasında 174 səs fərqi olub. Şəhər üzrə isə 620 səs etibarsız hesab edilib.
Onu da qeyd edək ki, öz növbəsində CHP-nin namizədi, şəhərin həm də hazırkı bələdiyyə başçısı olan Faruk Dəmir yerli telekanallara verdiyi açıqlamasında seçki qurumunun bu qərarına etiraz edəcəyini bildirib.
