Ukraynanın Baş naziri Denis Şmıqal istefa ərizəsi yazıb.

Senzor.az yerli KİV-ə istinadən bildirir ki, Baş nazirin rəsmi "Telegram" kanalında dərc olunan bəyanatda belə deyilir.

"Döyüş xəttində olan və Ukraynanı qoruyan həm kişi, həm də qadın müdafiəçilərimizə təşəkkür edirəm! Güvəndiyi üçün Ukrayna Prezidenti Volodimir Zelenskiyə təşəkkür edirəm! Ölkəmiz üçün yorulmaz fəaliyyətinə görə bütün komandaya təşəkkür edirəm!", - deyə Şmıqal bəyanatında vurğulayıb.

Qeyd edək ki, Ukraynada Baş nazirin istefası avtomatik olaraq bütün hökumətin istefasına səbəb olur. Hərbi vəziyyət rejimi haqqında qanunun 10-cu maddəsində hərbi vəziyyət dövründə Nazirlər Kabinetinin səlahiyyətlərinə xitam verilməsinin mümkünsüzlüyü ilə bağlı müddəa var.

Ukrayna Prezidenti V. Zelenski baş nazirin müavinləri Yuliya Sviridenko və Mixailo Fedorovla görüş keçirib. İclasda Nazirlər Kabinetinin qarşıdakı altı ay üçün vəzifələri müəyyən edilib.