ABŞ Prezidenti Donald Trampın oğlu Erik Tramp gələcəkdə ABŞ prezidentliyinə namizəd ola biləcəyini istisna etməyib, lakin bu barədə hələ qəti cavab verməyə hazır olmadığını söyləyib.

Bu barədə o, Yaponiyanın "Nikkei Asia" nəşrinə müsahibəsində danışıb.

““Yox” demirəm, amma “hə” də demirəm”, - Erik Tramp prezidentliyə namizədliklə bağlı suala belə cavab verib.

Nəşr qeyd edir ki, o, dövlət başçısı olmaq imkanını istisna etməsə də, hazırda məşğul olduğu ticarət sahəsində fəaliyyətini bəyənir.

Qeyd edək ki, Erik Tramp Donal Tramp və İvana Trampın üçüncü övladıdır. O, "The Trump Organization" şirkətində inkişaf və satınalmalar üzrə icraçı vitse-prezident vəzifəsini tutur, burada qardaşı Donald Tramp Jr. və bacısı İvanka Tramp ilə birgə çalışır. Bundan əlavə, Erik Tramp "Trump Winery" şərabçılıq şirkətinin sahibidir və kriptovalyuta sahəsində fəaliyyət göstərən World Liberty Financial şirkətinə də rəhbərlik edir.

Yeri gəlmişkən, Trampın özü avqustun 5-də bildirib ki, böyük ehtimalla bir daha prezident seçkilərində iştirak etməyəcək. Çünki ABŞ Konstitusiyası eyni şəxsin iki dəfədən artıq dövlət başçısı vəzifəsinə seçilməsini qadağan edir.