ABŞ Prezidenti Donald Tramp bildirib ki, ABŞ tərəfindən tətbiq edilən dəniz blokadası davam edərsə, İranın neft kəmərləri təxminən üç gün ərzində partlaya bilər.

Senzor.az bildirir ki, bu barədə o, "Fox News" telekanalına müsahibəsində danışıb.

Tramp vurğulayıb ki, İranın neft kəmərləri ilə böyük həcmdə neft daşınır.

"Əgər bu xətt neftin anbarlara və ya gəmilərə ötürülməsinin mümkünsüzlüyü səbəbindən bağlanarsa - ki, bu da hazırda İranın başına gəlir, çünki blokadaya görə gəmiləri yoxdur, bu zaman həmin xətt daxildən özü-özünü partladacaq", - deyə o bildirib.

Tramp qeyd edib ki, İranın bunun baş verməsinin qarşısını almaq üçün təxminən üç günü var.

ABŞ Prezidentinin sözlərinə görə, belə bir ssenari baş verərsə, İran neft hasilatı gücünün yarısını itirə bilər.

Həmin müsahibədə Donald Tramp bir daha iddia edib ki, İranla münaqişə ABŞ-ın qələbəsi ilə başa çatıb və tezliklə hər şey bitəcək: “Biz böyük iş görmüşük və bütün bunlar çox yaxında bitəcək”.