Ermənistanın Baş naziri Nikol Paşinyan Azərbaycanla danışıqlara dair sənədləri niyə ilin sonuna qədər dərc etmək qərarının səbəbini açıqlayıb.
Senzor.az-ın yerli KİV-ə istinadən məlumatına görə, Paşinyan bildirib ki, bu, ATƏT-in Minsk qrupunun ləğvi ilə bağlıdır.
“Proses başa çatdıqdan sonra biz bu sənədləri dərc edə biləcəyik, o zaman həmin sənədlərin dərc olunması üçün mənəvi və siyasi maneə aradan qalxacaq”, - o brifinqdə deyib.
Keçmiş prezident Serj Sarqsyanın başqa dövlətin liderinə məktubuna gəlincə, Paşinyan onu dərc etmək niyyətini bir daha təsdiqləyib. O, vaxtı açıqlamasa da, əlavə edib ki, hazırda sənədin məxfiliyi ləğv edilir.
Qeyd edək ki, Ermənistanın Baş naziri Nikol Paşinyan keçmiş Dağlıq Qarabağ münaqişəsi ilə bağlı danışıqlara dair sənədləri dərc edəcəyini deyib. Paşinyan Serj Sarqsyanın prezident olanda yazdığı məktubu dərc edəcəyini də vurğulayıb.
