Ermənistanın baş naziri Nikol Paşinyan ölkəsi üçün 3 əsas prioritet sahənin adını çəkib.

Senzor.az yerli KİV-ə istinadən bildirir ki, o, bu barədə Yay Məktəbinin iştirakçıları qarşısında çıxış edərkən danışıb.

“Məndən soruşsanız ki, yaxın gələcəkdə Ermənistan üçün nəyi prioritet hesab edirəm, 3 əsas istiqaməti qeyd edərdim: birincisi sülh, ikincisi təhsil, üçüncüsü ordu. Elə görünə bilər ki, birinci və üçüncü bir-biri ilə ziddiyyət təşkil edir, amma əslində bu belə deyil, çünki biz hökumətin proqramında də vurğulamışıq ki, Ermənistana güclü ordu təcavüzkar hərəkətlər üçün yox, ölkənin suverenliyi və ərazi bütövlüyünü qorumaq üçün lazımdır”, - deyə baş nazir vurğulayıb.

O, eyni zamanda Ermənistan üçün təhsilin həm sülh, həm də ordu və təhlükəsizlik kontekstində mərkəzi əhəmiyyət daşıdığını qeyd edərək, hökumətin “təhsil sahəsində çox böyük islahatlar” apardığını bildirib.