Kollektiv Təhlükəsizlik Müqaviləsi Təşkilatı (KTMT) Ermənistan tərəfindən müraciət aldığını təsdiqləyib.
Senzor.az bildirir ki, bu barədə KTMT-nin mətbuat xidmətindən məlumat verilib.
“KTMT Ermənistan tərəfdən müraciət alıb və tezliklə bununla bağlı bəyanat hazırlanacaq”, deyə qurumun mətbuat katibi vurğulayıb.
Bir az əvvəl Kollektiv Təhlükəsizlik Müqaviləsi Təşkilatı Azərbaycan-Ermənistan sərhədində gərginliklə bağlı həqiqətən də bəyanat yayıb.
Bəyanatda deyilir: "2022-ci il sentyabrın 13-nə keçən gecə Ermənistanla Azərbaycan sərhədində ağır silahlar və PUA-ların tətbiqi ilə toqquşma baş verib. Nəticədə ölən və yaralananlar var. Biz güc tətbiqini qəbuledilməz hesab edirik. Ziddiyyətlərin nizamlanması üçün Azərbaycan, Ermənistan və Rusiya liderlərinin 9 noyabr 2020-ci il, 11 yanvar və 26 noyabr 2021-ci il tarixli bəyanatlarında əksini tapmış razılaşmalardan, müstəsna olaraq siyasi və diplomatik üsullardan istifadə edilməlidir. Bu il sentyabrın 13-də saat 09:00-dan etibarən təmas xəttində atəşkəs əldə edilməsində Rusiya Federasiyasının vasitəçilik səylərini yüksək qiymətləndiririk”.
Bundan başqa bildirilib ki, Ermənistanın yardım üçün KTMT-nin Kollektiv Təhlükəsizlik Şurasına müraciəti ilə əlaqədar olaraq, Təşkilatın Katibliyində KTMT-nin Birləşmiş Qərargahı ilə birlikdə yaranmış vəziyyətin nizamlanması üçün KTMT mexanizmlərinin aktivləşdirilməsi üzrə iş təşkil edilib.
Qeyd edək ki, bunlardan əvvəl Ermənistanın baş naziri Nikol Paşinyan Azərbaycanla sərhəddə baş verən silahlı toqquşma ilə bağlı KTMT-yə müraciət etdiyini açıqlamışdı.
