ABŞ Konqresi Nümayəndələr Palatasının spikeri Nensi Pelosi bu gün Ermənistanda olacaq.
Senzor.az-ın məlumatına görə, Ermənistan hökumətindən yerli KİV-lərə bildirilib ki, Nensi Pelosinin baş nazir Nikol Paşinyan, eləcə də Nazirlər Kabinetinin digər üzvləri ilə görüşü gözlənilir.
Bu səfəri şərh edən erməni politoloq Suren Surenyantsun sözlərinə görə, rəsmi İrəvan Pelosinin gəlişinə böyük ümidlər bəsləyir. O, ABŞ rəsmisinin səfərindən maksimum istifadə etməyin vacibliyini vurğulayıb.
Politoloq Nensi Pelosinin İrəvana səfərinin Rusiyanı qıcıqlandıra biləcəyini də istisna etməyib.
"Ermənistanın Rusiya-Amerika qarşıdurması üçün yeni meydançaya çevrilə biləcəyi mümkündür", - deyə o əlavə edib.
Surenyants xatırladıb ki, Pelosi Konqresdə bir sıra ermənipərəst təşəbbüslərin müəllifidir.
Pelosinin səfəri kontekstində Vaşinqtondan hərbi dəstək gözlənməsinə gəlincə, politoloq hesab edir ki, ABŞ İrəvana hərbi-siyasi yardım etməyəcək, lakin siyasi dəstək verə bilər.
