Türkiyə Silahlı Qüvvələri (TSQ) milli istehsal olan texnika və avadanlıqlar sayəsində gücünü artırmaqda davam edir.

Senzor.az Milli Müdafiə Nazirliyinin saytına istinadən bildirir ki, mühüm məqsədlərdə istifadə etmək üçün helikopterləri tədarük etmək layihəsi çərçivəsində T-70 tipli yeni helikopter Hərbi Hava Qüvvələrinə təhvil verilib.

Qeyd edək ki, T-70 Türkiyənin TUSAŞ (Türk Havacılık ve Uzay Sanayi) şirkətinin istehsalıdır. Helikopter TUSAŞ-ın ASELSAN və “Sikorsky” ilə strateji əməkdaşlığı çərçivəsində dünyanın ən müasir avionika arxitekturalarından biri ilə istehsal olunub. S-70i helikopteri əsasında hazırlanan uçuş platformasının istehsalında “Alp Havacılık” və TEI şirkətləri də iştirak ediblər.

Bildirilir ki, arsenala yeni daxil edilən helikopter TSQ-nin Konyadakı hava qüvvələrinə məxsus hərbi hissənin xidmətinə veriləcək.