Gürcüstanda kütləvi aksiyaların keçirilməsi ilə bağlı qaydalar yenidən sərtləşdirilir.
Senzor.az yerli KİV-ə istinadən bildirir ki, bununla əlaqədar parlamentin “Toplantılar və nümayişlər haqqında” Qanununa və İnzibati Xətalar Məcəlləsinə düzəlişlər ediləcək.
Layihəyə əsasən, aksiyalarla bağlı dövlət orqanlarına əvvəlcədən xəbərdarlıq ediləcək. Sənəddə bildirilib ki, toplantı və yaxud nümayiş ictimai təhlükəsizliyə və asayişə, müəssisə və təşkilatların normal fəaliyyətinə, nəqliyyat vasitələri və insanların hərəkətinə təhlükə yaradırsa, dövlət orqanı iştirakçıları alternativ məkan, aksiyanın keçirilmə vaxtı və yaxud üsulu barədə təlimatlandırmaq səlahiyyətinə malik olacaq. Bu təlimatın yerinə yetirilməməsi məsuliyyətə səbəb olacaq.
Gürcüstan parlamentində düzəlişlərin sürətləndirilmiş qaydada qəbul ediləcəyi gözlənilir.
Qeyd edək ki, bu ilin oktyabrında Gürcüstanda ölkədə toplantı və nümayişlərlə bağlı qaydaların pozulmasına görə hüquqi məsuliyyət daha da sərtləşdirilib.
