Aprelin 22-də Azərbaycan Kibertəhlükəsizlik Təşkilatları Assosiasiyasının (AKTA) təqdimat mərasimi keçirilib.Senzor.az bildirir ki, kibertəhlükəsizlik sahəsindəki fəaliyyətlərin zəruriliyini nəzərə alaraq bu il fevralın 22-də informasiya kommunikasiya texnologiyaları və kibertəhlükəsizlik istiqamətində fəaliyyət göstərən təşkilatların, həmçinin mütəxəssislərin vahid platforması olan AKTA təsis edilib. AKTA-nın İdarə Heyətinin sədri Rahid Ələkbərovdur.
Azərbaycanda IT və kibertəhlükəsizlik sahəsində fəaliyyət göstərən şirkətlər, təşkilatlar və mütəxəssisləri vahid platformada birləşdirməyi hədəfləyən Assosiasiyanın əsas məqsədləri Azərbaycanda kibertəhlükəsizlik mühitinin gücləndirilməsi və təmini sahəsində həyata keçirilən tədbirlərin koordinasiyası və ölkədə bu sahənin inkişafına dəstək verilməsidir. Tədbirdə Dövlət Təhlükəsizlik Xidmətinin rəisi general-polkovnik Əli Nağıyev, təhsil naziri Emin Əmrullayev, rəqəmsal inkişaf və nəqliyyat naziri Rəşad Nəbiyev iştirak ediblər.
Mərasimində çıxış edən Rəqəmsal inkişaf və nəqliyyat naziri Rəşad Nəbiyev deyib ki, dünyada baş verən rəqəmsallaşma Azərbaycanı da bir sıra çağırışlarla üz-üzə qoyur.
R.Nəbiyevin sözlərinə görə, bu baxımdan nazirlik bir neçə istiqamətli siyasət müəyyən edib: "İlk növbədə bu rəqəmsallaşma səviyyəsində kibertəhdidlərə hazır olan bir cəmiyyət qurmaq. Bu cəmiyyətdə istər mərkəzi icra hakimiyyəti orqanlarının siyasəti, istərsə bizim infrastruktur məsələlərimiz, istərsə də bizim qanunvericilik məsələlərimiz. İkinci buradan doğan ən vacib məsələ, kritik infrastruktur və kritik infrastrukturun özünün müəyyən edilməsidir. Bu və ya digər ölkələrdə, cəmiyyətlərdə kritik infrastruktur fərqli anlayışla müəyyən edilə bilər. Biz, Dövlət Təhlükəsizliyi Xidməti və digər dövlət qurumları ilə birlikdə çalışırıq ki, elə bir kritik infrastruktur müəyyən edilsin ki, ölkədə ümumi inkişafa mənfi təsir etməməklə eyni zamanda bizim üçün vacib olan milli təhlükəsizliyimizin qorunmasını təmin etsin. Həmçinin tənzimləmə mexanizmləri elə qurulmalıdır ki, buradan hamı uduşlu çıxsın".Nazir əlavə edib ki, kibertəhlükəsizliklə bağlı milli strategiya yekunlaşmaq üzrədir: "44 günlük Vətən müharibəsində biz gördük ki, yerdə olan təhdidlərlə yanaşı virtual aləmdə olan təhlükələr də vacibdir. Biz artıq gedəcəyimiz yolun strategiyası barədə düşündük. Ona görə də, 2022-2027-ci illər üzrə informasiya və kibertəhlükəsizlik sahəsində strategiya var. Hesab edirəm ki, yaxın zamanlarda bu strategiya qəbul olunmaqla bizim bu sahədəki işlərimizə öz təkanını verəcək".
ADA Universitetinin prorektoru Fariz İsmayılzadə mərasimdə bildirib ki, yaxın 10 il ərzində dünyada kibertəhlükəsizlik üzrə iş yerlərinin sayının 31% artacağı gözlənilir.
"Bu gün yaradılan Assosiasiya dediyim sahədə kordinasiyalı işə çox kömək olacaq. Bizim kadrlarımız xarici bazarlara üstünlük verirlər və yerli bazarda qıtlıq yaranır. Hazırda dünyada kibertəhlükəsizlik sahəsində 3 milyondan çox vakant yer var. ADA Universiteti kadr potensialının formalaşdırılması üçün bir sıra işlər görür. Eyni zamanda gələcəkdə bununla bağlı təlimlərin keçirilməsi planlaşdırılır. Yeni Assosiasiyanın üstünlüyü odur ki, biz xaricdən gələn təklifləri birgə müzakirə edib qərarlar verə bilərik”, - deyə o, qeyd edib. Dövlət Təhlükəsizliyi Xidməti (DTX) rəisinin müavini İlqar Musayev təqdimat mərasimində bildirib ki, kibertəhlükə ilə mübarizədə uğurlu nəticələrin əldə olunması üçün dövlət və özəl sektorda fəaliyyət göstərən subyektlərin, vətəndaş cəmiyyətlərinin birgə işinə ehtiyac var.
Onun sözlərinə görə, DTX-da yeni fəaliyyət istiqamətləri yaradılıb: "Bu gün kibertəhlükəsizlik məsələləri dünyanın gündəmində olan bir nömrəli məsələlərdən biridir. Ona görə də hesab edirəm ki, yeni yaradılan Azərbaycan Kibertəhlükəsizlik Təşkilatları Assosiasiyası ətrafında sıx birləşməliyik". İ.Musayev həmçinin deyib ki, DTX tərəfindən həyata keçirilən kiber əməliyyatlar nəticəsində Azərbaycanın Silahlı Qüvvələrinə zəruri dəstək verilib.
“Azərbaycanda 2022-2023-cü tədris ili üçün bakalavr səviyyəsində İKT ixtisasları üzrə qəbul yerlərinin sayı 3 750 olacaq. Bu, 2017-2018-ci tədris ilinə nisbətən 1,9 dəfə çoxdur. Həmin il qəbul yerlərinin sayı 1 964 olub”.
Bunu isə təqdimat mərasimində təhsil naziri Emin Əmrullayev deyib.
"O cümlədən, dövlət sifarişli yerlərin sayı 670-dən 2 500-ə çatdırılıb. Bu isə təqribən 4 dəfəyə yaxın artım deməkdir. Bu istiqamətdə bizim işlərimiz davam edəcək. Magistratura səviyyəsində də oxşar dəyişikliklər var. Ümumi yerlər 370-dən 1083-ə, dövlət sifarişli yerlər isə 195-dən 720-yə çatdırılıb", - deyə o, qeyd edib.
Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev deyib ki, Azərbaycan vətəndaşları elektron xidmətlərdən geniş istifadə edirlər: "Kibertəhlükəsizlik ASAN Xidmətin prioritet istiqamətlərindən biridir. Bölmələrimizdə hər gün böyük həcmdə məlumat emal olunur və sistemlərimizin kibertəhlükələrə qarşı dayanıqlığının təmin edilməsi üçün müvafiq işlər görülür".
