G7 ölkələrinin liderlərinin virtual formatda görüşü keçirilib.Senzor.az bildirir ki, bu barədə Avropa Komissiyasının Prezidenti Ursula fon der Lyayen "Twitter"də məlumat verib.
"Bu gün Ukrayna Prezidenti Zelenskinin iştirakı ilə biz G7 ölkələri Rusiyanın işğalı qarşısında Ukraynaya dəstəyimizi necə gücləndirəcəyimizi müzakirə etdik.
Ölkə iqtisadiyyatının işləməsi üçün əlavə maliyyə yardımı və Ukraynanın ixracına, xüsusilə də kənd təsərrüfatı mallarının ixracına kömək üçün addımların atılması barədə danışdıq. Avropa Komissiyası Ukraynanın yanındadır", - Ursula fon der Lyayen bildirib.
Ukrayna Prezidenti Volodimir Zelenski G7 liderlərinin virtual görüşündə çıxış edərək Rusiya ilə müharibədə ölkəsinin əsas hədəflərini açıqlayıb.
Ukrayna Prezidenti çıxışı zamanı qeyd edib ki, ölkə bundan sonra da öz suverenliyini və ərazi bütövlüyünü qətiyyətlə müdafiə edəcək.
Zelenskinin sözlərinə görə, Rusiyaya qarşı müharibədə Ukrayna üçün əsas hədəflər Rusiya hərbçiləri və texnikasının ölkə ərazisindən tamamilə çıxarılması, eləcə də Ukraynanın gələcəkdə özünü müdafiə edə bilməsini təmin etməkdir.
Prezident vurğulayıb ki, o, bu işlərdə Ukraynanın beynəlxalq müttəfiqlərinə, o cümlədən G7 liderlərinə ümid edir.
