Mayın 9-da Ermənistanda müxalifətin yürüşü bütün paytaxt boyunca davam edib.Senzor.az “Sputink Armeniya”ya istinadən bildirir ki, nümayişçilər İrəvanın Fransa meydanından yürüşə başlayıblar. Onlar Baqramyan prospektinə qədər yürüş ediblər.
Daha sonra Proşyan küçəsinə gedərək oradan geri – Fransa meydanına qayıdıblar.
"Müqavimət" hərəkatının liderlərindən olan İşxan Saqatelyan burada keçirilən mitinqdə hökumət binalarının bloklanacağını istisna etməyib.
"Sabah, birincisi, fəhlə və tələbə tətili elan edirik. İkincisi, hərə küçəyə özü ilə bir vətəndaş da çıxarır. Əgər sabah biz itaətsizlik aksiyalarına başlasaq və zəruri hallarda dövlət və hökumət binalarını bloklasaq, hakimiyyəti qəti şəkildə diz üstə qoyacağıq", - deyə Saqatelyan bildirib.
Onun sözlərinə görə, Nikol Paşinyanın hakimiyyətdə olduğu hər yeni gün ölkənin maraqlarına cavab vermədiyi üçün onu-ölkəni “iflic etmək” lazımdır. Saqatelyan qeyd edib ki, aksiyalar dörd istiqamətdə keçiriləcək. Yürüş Qaya küçəsindən, Raffi küçəsindən, 15-ci məhəllədən və Dəmir yolu vağzalının binasından başlayacaq.
Yürüşlər eyni vaxtda - saat 12:00-da başlamalı və şəhəri iflic etməlidir. O, həmçinin fərdi aksiyalar keçirməyə çağırıb, onların məqsədi polisi disorientasiya etməkdir. Yəni elə etmək lazımdır ki, polis hər şeyə reaksiya verməyə macal tapmasın.
Bir sözlə, mayın 10-da İrəvanda sürprizlər yaşana bilər. Gözləyək...
Senzor.az
