Türkiyə Elmi və Texniki Araşdırmalar Şurasının (TÜBİTAK) mütəxəssisləri, xüsusilə "Akıncı" zərbə pilotsuz uçuş aparatlarına (PUA) inteqrasiyası planlaşdırılan “hava-hava” tipli raketlərin yaradılması layihəsini həyata keçirir.
Senzor.az bildirir ki, TÜBİTAK-ın Müdafiə Sənayesi Tədqiqat İnstitutunun direktoru Gürcan Okumuş "Anadolu"ya müsahibəsində yeni sursatların gələcəkdə digər PUA-lara da inteqrasiya oluna biləcəyini söyləyib.
"Hava-hava raketləri insanlı və pilotsuz təyyarələr üçün vacibdir və çox vaxt hədəfləri uzaq məsafədən vuran "hava qılıncları" adlanır. Ölkələr bu cür yüksək texnoloji həlləri bir-birilərinə ixrac etmək istəmirlər və bəzən bunu ümumiyyətlə etmirlər", - o bildirib.
Onun sözlərinə görə, Türkiyə müdafiə sənayesində ciddi irəliləyişlər əldə edib və artıq əhəmiyyətli texnologiyalara malikdir.
“Türkiyə bəzi sahələrdə ilk 5-liyə, bəzilərində isə ilk onluğa daxildir”, - deyə Okumuş vurğulayıb.
