Prezident İlham Əliyev bu ilin altı ayının yekunlarına həsr olunan müşavirədə qazanılan uğurlardan danışarkən xüsusi vurğulayıb ki, bütün bunları pandemiyadan təzə çıxmış ölkə əldə edib.

Senzor.az-ın məlumatına görə, dövlət başçımız, həmçinin təəssüflə xatırladıb ki, xəstəliyin yenidən yayılma ehtimalı ilə bağlı məlumatlar var.

“Əfsuslar olsun, yeni məlumat var, özü də Ümumdünya Səhiyyə Təşkilatı bu məlumatı yayıb ki, indi bəzi ölkələrdə yenə maska rejiminə keçmək lazımdır. Biz, əlbəttə ki, bu tendensiyaları izləyirik və biz pandemiyanın ən ağır dönəmində də qapanmaya getmişdik, sonra vəziyyət yaxşılaşanda açılırdıq. Yəni, bu, canlı bir prosesdir. Bizim quru sərhədlərimiz bağlıdır və bağlı olmalıdır. Nə üçün? İnsanlar xəstələnməsin. Çünki ən çox bu xəstəliyin yayılma istiqaməti quru sərhədləridir. Ona görə biz sərhədlərimizi bağlı saxlayırıq və düz də edirik. Nə qədər lazımdırsa, o qədər də sərhədləri bağlı saxlayacağıq - quru sərhədlərindən söhbət gedir. Bunu edirik ki, insanların sağlamlığını qoruyaq, insanları itirməyək. Bizim məqsədimiz budur”, - deyə Prezident bildirib.