Azərbaycanda ilk dəfə təşkil olunan bədii gimnastika üzrə Avropa kubokunun açılış mərasimi keçirilib.
Senzor.az bildirir ki, Milli Gimnastika Arenasında baş tutan tədbir iştirakçı ölkələrin bayraqlarının arenaya gətirilməsi ilə başlayıb.
Gənclər və idman naziri Fərid Qayıbov açılış nitqi ilə qonaqları salamlayaraq iştirakçılara uğurlar arzulayıb: "Avropa kubokunda hər bir iştirakçıya ayrı-ayrılıqda uğurlar arzulayıram. İnanıram ki, ən güclü olanlar qalib gələcək. Azərbaycanda bütün gimnastika növlərində inkişaf hiss olunur. Bu, dövlət başçısının dəstəyi ilə həyata keçir".
Sonra Avropa Kuboku açıq elan olunub və Azərbaycan Respublikasının Dövlət Himni səsləndirilib. Açılış mərasimi bədii hissə ilə davam edib. Bədii gimnastlar tərəfindən musiqi sədaları altında rəqs şousu nümayiş olunub.
Xatırladaq ki, mayın 5-dək davam edəcək Avropa Kubokunda 37 ölkədən 160 gimnast mübarizə aparır. Yarışda mükafatçılar fərdi və çoxnövçülük proqramında, eləcə də komanda hesabında müəyyənləşəcək. 
**10:27
Mayın 3-də Bakıda ilk dəfə keçirilən bədii gimnastika üzrə Avropa Kuboku start götürəcək.
Milli Gimnastika Arenasında təşkil ediləcək yarışda 37 ölkəni təmsil edən 160 idmançı bacarığını nümayiş etdirəcək.
Azərbaycanı turnirdə fərdi proqramda Zöhrə Ağamirova və Kamilla Seyidzadə, qrup hərəkətləri proqramında isə Zeynəb Hümmətova, Güllü Ağalarzadə, Darya Sorokina, Yelizaveta Luzan, Ləman Əlimuradova və Kamilla Əliyevadan ibarət komanda təmsil edir.
Mayın 5-dək davam edəcək yarışların proqramına əsasən, böyük fərdi gimnastlar “çarpaz-qarşılaşmalar” sistemi ilə mübarizə aparırlar. Bununla da onlar təsnifat yarışlarından sonra final mərhələsinə yüksəlmək üçün bir-biriləri ilə yarışacaqlar.
Avropa Kubokunda qaliblər fərdi və çoxnövçülük proqramında, eləcə də komanda hesabında müəyyənləşəcək. Qaliblərə medal və hədiyyələrlə yanaşı pul mükafatı da veriləcək. Çarpaz qarşılaşmalarda qalib 8000, ikinci yeri tutan 5000, üçüncü yeri tutan 3000, dördüncü yeri tutan 2000, 5-8-ci yerləri tutanların hər biri 1000, 9-16-cı yerləri tutanların hər biri 500 avro qazanacaq. Böyüklərdən ibarət qrup hərəkətləri komandaları arasında çoxnövçülük üzrə qalib 5000, gümüş medal qazanan 3500, bürünc medalçı 2500 avronun sahibi olacaq. Gənc yaş qruplarının yarışında komanda hesabında qalibi 1300, ikinci yeri tutanı 1000 və üçüncü yerin sahibini isə 700 avro gözləyir.
