İsrailin Baş naziri Benyamin Netanyahu Ağ Evdə ABŞ Prezidenti Donald Trampla 90 dəqiqəlik görüş keçirib.
Bu barədə "Axios" nəşri məlumat yayıb.
Danışıqlar qapalı qapılar arxasında Vitse-prezident Ceyms Devid Vensin iştirakı ilə baş tutub. Bu, Netanyahunun Vaşinqtona səfəri zamanı ikinci dialoqdur - ilk görüş bir gün əvvəl baş tutub.
Bu görüşlərlə bağlı Ağ Evə Qətərdən də nümayəndə heyəti gəlib. Məlumata görə, Qətər nümayəndələri ABŞ rəsmiləri ilə danışıqlar aparıb, burada İsrail və HƏMAS arasında mümkün atəşkəs razılaşmasını müzakirə ediblər.
Nəşrin həmsöhbəti qeyd edib ki, razılaşma yolunda əsas büdrəmə İsrail qoşunlarının Qəzza zolağından çıxarılması məsələsidir. Mənbənin sözlərinə görə, Fələstin tərəfi İsrail Müdafiə Ordusunun martda əvvəlki atəşkəsin pozulmasından öncə mövcud olan mövqelərə qaytarılmasını tələb edir. İsrail də öz növbəsində bu şərtlə razılaşmır.
Bununla belə, danışıqlar davam edir, lakin sülh təşəbbüsü ilə bağlı yekun qərar hələ qəbul edilməyib.
