Əfqanıstanda xeyli sayda hərbçi “Taliban” terrorçularına əsir düşüb.
"France-Presse" yazır ki, bu barədə Qunduz əyalətinin şura üzvü Amruddin Vali məlumat verib.
Onun sözlərinə görə, Əfqanıstan təhlükəsizlik qüvvələrinin əsgərləri Tacikistanla sərhəd yaxınlığında gözlənilmədən terrorçuların əlinə keçiblər.
"Bu səhər hava limanında dayanan yüzlərlə hərbi qulluqçu, polis və müqavimətçi qüvvələr bütün texnikaları ilə birgə “Taliban” silahlılarına təslim oldular",-Vali deyib.
Qeyd edək ki, silahlılar son aylarda Əfqanıstanın qəsəbə və sərhəd bölgələrində əhəmiyyətli əraziləri ələ keçirməyi bacarıblar. Hökumət qüvvələri ilə “Taliban” silahlıları arasında gedən döyüşlər son günlərdə daha intensiv hal alıb. Vəziyyətin gərginləşməsi Amerika qoşunlarının geri çəkilməsi fonunda baş verir.
