"Qarabağ" UEFA Konfrans Liqasının pley-off mərhələsində cavab oyununa çıxıb.
Senzor.az bildirir ki, Qurban Qurbanovun baş məşqçi olduğu komanda Şotlandiyada "Aberdin"in qonağı olub.
Bakıdakı ilk görüşdə 1:0 hesablı qələbə qazanan Ağdam təmsilçisi rəqibini səfərdə də üstələyib (3:1) və qrup mərhələsinə vəsiqə qazanıb.
Beləliklə, "Qarabağ" ardıcıl 8-ci mövsüm avrokubokların qrup mərhələsində iştirak hüququna yiyələnib. Xatırladaq ki, Q.Qurbanovun komandası 2017/18 mövsümündə qitənin ən güclülərinin yarışdığı Çempionlar Liqasında əsas raundda mübarizə aparıb.
2014/15, 2015/16, 2016/17, 2018/19, 2019/20 və 2020/21 mövsümlərində isə ikinci dərəcəli klub turnirində - Avropa Liqasında qrupa düşüb.
Onu da qeyd edək ki, Konfrans Liqasının püşkatma mərasimi bu gün-avqustun 27-də Bakı vaxtı ilə saat 15:30-da başlayacaq.
