Lerikdə avtomobil dərəyə aşıb.
APA-nın verdiyi məlumata görə, hadisə gecə saatlarında Lənkəran-Lerik yolunun 28 km-də baş verib.
Lənkəran şəhər sakini, 1992-ci il təvəllüdlü Hüseyn Ataxan oğlu Məmmədli idarə etdiyi "Opel Astra" markalı avtomobillə təqribən 80-100 metr hündürlükdən dərəyə yuvarlanıb. Hadisə yerinə FHN-in Cənub Regional Mərkəzinin xüsusi riskli xilasetmə qüvvələri cəlb olunub. Xilasedicilərin köməyi ilə sürücü deformasiyaya uğrayan avtomobilin içərisindən çıxarılaraq, Lənkəran Rayon Mərkəzi Xəstəxanasına çatdırılıb.
Qeyd edək ki, sürücü Lerik rayonuna, kəndlərin birinə dərman çatdırmalı imiş. İlkin versiyaya görə yolun dumanlı, yağışlı olması avtomobilin sürüşərək dərəyə düşməsinə səbəb olub.
Faktla bağlı araşdırma aparılır.
