Azərbaycan Tibb Universitetində (ATU) 2023-cü ildə fəaliyyətə başlayacaq təcili tibb təhsili üzrə kurasiya proqramının bacarıq əsaslı kurikulumunun yaradılmasına başlanılıb.
Bu barədə Senzor.az-a Ümumdünya Səhiyyə Təşkilatının Azərbaycan Nümayəndəliyindən xəbər verilib.
Bildirilib ki, ABŞ-ın Beynəlxalq İnkişaf Agentiliyi (USAID) və Ümumdünya Səhiyyə Təşkilatının (ÜST) dəstəklədiyi proqram ambulans və xəstəxanalarda yüksək səviyyəli təcili tibbi yardım xidmətinin təmin edilməsi üçün insan resursları potensialını gücləndirmək məqsədi daşıyır və bu sahədə ölkənin ilk tədris proqramıdır.
Təcili tibbi yardım üzrə təhsil proqramının yaradılması ölkədə təcili tibbi yardım xidmətinin keyfiyyətinin artırılması baxımından əhəmiyyətli bir mərhələdir. ATU ölkənin təcili tibbi xidmət ehtiyacını qarşılamaq üçün bacarıqlı mütəxəssis yetişdirilməsində qərarlıdır. Sözügedən proqram Azərbaycanda səhiyyənin inkişafında ATU, Səhiyyə Nazirliyi və beynəlxalq ictimaiyyət arasındakı güclü tərəfdaşlığın göstəricisidir.
Proqramın kurikulumunun hazırlanması məqsədilə fevralın 13-15-də keçirilmiş 3 günlük seminarda səhiyyə nazirinin müavini Dr. Nadir Zeynalov, ÜST-nin ekspertləri, ATU-nun prorektor və dekanları, dekan müavinləri, kafedra rəhbərləri və müəllimləri iştirak edib. İştirakçılar 4 işçi qrupuna bölünərək ADDIE (təhlil, dizayn, təkmilləşdirmə, tətbiq, qiymətləndirmə) modelindən istifadə etməklə müzakirələr aparıb.
Seminar USAID-in maliyyə dəstəyi ilə ÜST-nin Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB-lə əməkdaşlıqda həyata keçirdiyi “Azərbaycanda pandemiyaya cavab tədbirləri” (APR) layihəsi çərçivəsində təşkil edilib. Tədbirin keçirilməsi 2022-ci ilin dekabrında baş tutmuş “Təcili yardım sisteminin (TYS) təkmilləşdirilməsi həftəsi” zamanı razılaşdırılmış daha genişmiqyaslı fəaliyyət planının tərkib hissəsidir.
Seminara qatılan ATU nümayəndələrindən 4-ü 24 təcili tibbi yardım mütəxəssisindən ibarət “TYS-nin gücləndirilməsinə dair potensial qrup”un üzvləridir. Yeni təhsil proqramının yaradılmasında fəal iştirak edən bu şəxslərin gələcəkdə proqramın icra edilməsində önəmli rol oynaması nəzərdə tutulur. Qeyd edilən qrupun üzvləri APR layihəsi çərçivəsində növbəti 2 il ərzində təcili tibbi yardım sahəsində geniş əhatəli təlimlərdə iştirak edəcək və Azərbaycanda TYS-nin transformasiyasına töhfə verəcək.
ÜST və USAID təcili yardım sisteminin təkmilləşdirilməsi üçün bilik və bacarıqların gücləndirilməsi və texniki yardım vasitəsilə ictimai səhiyyə böhranlarına qarşı ölkənin mübarizə potensialının artırılmasına dəstək olmağa davam edəcək.
