Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin “Orta əsr Ağsu Şəhəri” Dövlət Tarix-Mədəniyyət Qoruğu və “Miras” Mədəni İrsin Öyrənilməsinə Kömək İctimai Birliyinin birgə təşkilatçılığı ilə qoruq daxilindəki tarixi Cümə məscidində Qarabağ müharibəsi şəhidlərinə və qazilərə həsr olunan “Zəfər qəhrəmanları” sərgisi açılıb.AzərTAc xəbər verir ki, sərgidə Birinci və İkinci Qarabağ müharibələrinin şəhidlərinə və iştirakçılarına məxsus geyimlər, mülki və hərbi əşyalar, fotolar, sənədlər, medallar və sair eksponatlar nümayiş olunur. Sentyabrın 27-də Vətən müharibəsinin birinci ildönümü günündən başlayaraq qoruq əməkdaşları və ictimai birliyin üzvləri Ağsu şəhərində və kəndlərdə, Bakı və Sumqayıt şəhərlərində yaşayan şəhid ailələri ilə görüşüb, onlardan övladları haqqında məlumatlar toplayıblar.
Sərginin əsas hissəsini Ağsu rayonundan 44 günlük Vətən müharibəsində şəhidlik zirvəsinə ucalan 34 şəhidin əşyaları, foto və sənədləri təşkil edir. Sərginin ilin sonunadək – dekabrın 31-nə qədər ziyarətçilər üçün açıq olması planlaşdırılıb.“Zəfər qəhrəmanları” sərgisinin açılışında şəhid ailələri, qazilər, müharibə iştirakçıları, Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəhbər işçiləri, “Orta əsr Ağsu Şəhəri” Dövlət Tarix-Mədəniyyət Qoruğunun əməkdaşları, "Miras" Mədəni İrsin Öyrənilməsinə Kömək İctimai Birliyinin üzvləri və ictimaiyyətin nümayəndələri iştirak ediblər.
Qoruğun direktoru, tarix üzrə fəlsəfə doktoru Fariz Xəlilli tədbiri açaraq bildirib ki, sərginin açılışından öncə şəhid ailələri ilə həm sərgi, həm də kitab-albom üçün görüşüb, onların rəy, təklif və məlumatlarını toplayıblar. Şəhid ailələrinin hamısı şəhidlərin daim xatırlanmasını, unudulmamasını arzuladıqlarını bildiriblər. Bu sərgi məhz həmin məqsədə xidmət edən sosial-mədəni hadisədir. Sərgi müddətində Ağsu və ətraf rayonların məktəb, kollec və universitetləri ilə tədbirlər, yarışlar, ustad dərslərinin keçirilməsi nəzərdə tutulub. Bunun üçün 10 adda müxtəlif proqram hazırlanıb. Heykəltaraş Vüqar Quliyevin “Şuşa qalası” abidələrini birlikdə quraq”, sənətşünas Səma Alməmmədli və bələdçi Xoşqədəm Əkbərlinin “Zəfər rəsmləri” mövzularında ustad dərsləri, qoruğun əməkdaşı Şəlalə Osmanlının təqdimatı ilə “Zəfər qəhrəmanları” mövzusunda esse yarışı, Ağsu Rayon Gənclər və İdman İdarəsinin təşkilatçılığı ilə voleybol turniri, bələdçi Bilal Əzizovun təqdimatı ilə “Zəfər qəhrəmanları” mövzusunda ingilis dilində esse hazırlanması və məktəblilərin öz yazılarını oxuyaraq videoçəkiliş etmələri, şəhid atası olan qoruq əməkdaşları Pərviz Quliyev və Aqil Süleymanovun təşkilatçılığı ilə şəhid ailələri və qazilərin “Zəfər qəhrəmanları” mövzusunda məruzələrinin dinlənilməsi, debatda məktəblilərin suallarının cavablandırılması, “Xançoban” Musiqi Qrupunun rəhbəri, xanəndə Ruslan Adgözəlovun təqdimatı ilə muğam üzrə ustad dərsi, məktəblilərə “Xudayar təsnifi”nin incəlikləri barədə məlumat verilməsi, abidə mühafizəçisi Pərviz Osmanovun təqdimatı ilə şəhidlərin əl işlərinin surətlərinin, suvenirlərin hazırlanması, abidənin mühafizəçiləri - müharibə iştirakçıları Vüqar Hacıyev və Nəcəf Nəcəfovun imitasiya olunmuş hərbi təlimi, fotoqraf Anar Həbibovun məktəblilərə foto və video çəkilişlərə dair ustad dərsi, məktəblilərin qoruqda və sərgidə sərbəst şəkildə fotoçəkilişləri bu qəbildəndir.
Azərbaycan Milli Elmlər Akademiyasının Arxeologiya, Etnoqrafiya və Antropologiya İnstitutunun Albanşünaslıq Mərkəzinin rəhbəri professor Qafar Cəbiyev çıxışında Qarabağ müharibəsindən, Prezident, Müzəffər Ali Baş Komandan İlham Əliyevin rəhbərliyi ilə Vətən müharibəsində qazanılan tarixi Qələbədən, rəşadətli Ordumuzun şücaətindən bəhs edib. Professor sərginin şəhid və qazilərə həsr olunmasının, onların əşyalarının dəyərli tarixi eksponat kimi sərgilənməsinin əhəmiyyətini vurğulayıb.
Azərbaycan Texniki Universitetinin professoru Şikar Qasımov Birinci və İkinci Qarabağ müharibələrindən, sərgidə hər iki müharibənin şəhidlərinin əşyalarının nümayiş olunmasının vətənpərvərlik, varislik baxımından əhəmiyyətindən danışıb. Laçından olduğunu vurğulayan professor Laçının Ali Baş Komandanın diplomatik təzyiqləri, şəhid və qazilərimizin qanı bahasına azad edildiyini bildirib.
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin mətbuat katibi Fariz Hüseynli “Orta əsr Ağsu Şəhəri” Dövlət Tarix-Mədəniyyət Qoruğunun “Zəfər qəhrəmanları” sərgisini təqdir edib, bu istiqamətdə işlərin gələcəkdə də davam etdiriləcəyini bildirib.
Ağsu Rayon İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Bəxtiyar Məmmədov şəhid və qazilərə həsr olunmuş sərgi və kitabların hazırlanmasının nəinki mədəni, həm də elmi hadisə olduğunu, alimlərimizin bu sahədə tədqiqatlarını davam etdirəcəklərinə inandığını vurğulayıb. Şəhid anaları Şölə Vahabova, Əsli Təhməzova, Könül Quliyeva, Fəxriyyə Xəlilova, Narınc Məlikova, şəhid ataları Habil Cəbiyev, Namiq Cəfərov, Mirzə Şamilov və şəhid İlkin Zülfüqarovun bacısı Əfsanə Ələkbərova şəhidlərimizlə bağlı xatirələrini bölüşüb, sərginin təşkilatçılarına təşəkkürlərini bildiriblər.
Sonra məktəblilər Vətənə, şəhidlərə həsr olunan şeirlər səsləndiriblər.
Sonda şəhid Fərid Nəcəfovun bacıları Aytac və Ayşən “Zəfər qəhrəmanları” sərgisinin açılış lentini kəsiblər.
İştirakçılar sərgi zalında eksponatlara baxıb, rəy və təkliflərini bildiriblər. Şəhid ailələri sərginin daha da zənginləşdirilməsi və davamlı olması üçün dəstək verəcəklərini qeyd ediblər. Sərgidə xatirə fotoları çəkilib, ürək sözləri deyilib.
