Azərbaycan Xalq Cəbhəsi Partiyası (AXCP) Rəyasət Heyətinin üzvü İlham Hüseyn yanvarın 21-də Baş Prokurorluğa çağırılıb, orada ona şifahi xəbərdarlıq edilib. Bu barədə Turan-a İlham Hüseyn özü məlumat verib.
İ.Hüseynin sözlərinə görə, xəbərdarlığa onun 2021-ci ilin noyabrında "Azadlıq" qəzetinə istinadla Facebook-da dərc etdiyi status səbəb olub.
"Mənə bildirdilər ki, Baş Prokurorluğa çağırılmağım 2021-ci ilin noyabrında "Azadlıq" qəzetinin səhifəsindən Laçın rayonunda döyüşlər haqqında Müdafiə Nazirliyi tərəfindən təsdiq edilməmiş yazını paylaşmağımla bağlıdır. Mənə şifahi xəbərdarlıq edildi", - deyə fəal bildirib.
Xatırladaq ki, 2021-ci il dekabrın 1-də o, həbsdə aclıq edən müxalifət fəalı Saleh Rüstəmovun azad edilməsi tələbi ilə mitinq keçirərkən saxlanılmış, karantin rejimini pozmaq ittihamı ilə 30 gün inzibati həbs cəzasına məhkum edilmişdi.
