Prezident İlham Əliyevin “Azərbaycanın gələcək inkişafı sənayenin inkişafı ilə bağlı olmalıdır” strateji xəttinə uyğun olaraq, ölkəmizdə həyata keçirilən sənayeləşmə siyasəti nəticəsində yüzlərlə müasir sənaye müəssisəsi, yeni sənaye sahələri yaradılıb, daxili tələbatın ödənilməsində yerli məhsulların payı əhəmiyyətli dərəcədə artıb, ixracın həcmi yüksəlib. Ölkə başçısının siyasi iradəsi əsasında müəyyənləşdirilən bu strateji kursa uyğun olaraq müxtəlif istiqamətləri əhatə edən layihələr yalnız paytaxt Bakıda deyil, digər iri şəhərlərdə, eləcə də respublikanın əksər bölgələrində reallaşdırılır.
Senzor.az bildirir ki, belə müəssisələrdən biri də Şəmkir rayonunda yerləşən Zəyəm Texnalogiyalar Parkıdır.
Müəssisənin inkişaf konsepsiyası ölkənin ixrac potensialının artırılması, yəni xarici bazarlara sabit və etibarlı çıxışın təmin edilməsi, milli brendlərin yaradılması, istehsalçı və istehlakçı arasında inteqrasiya münasibətlərinin formalaşmasında əhəmiyyətli rol oynayacaq.
Şəmkir Rayon İcra Hakimiyyətinin başçısı Rəşad Tağıyev bu gün Zəyəm Texnalogiyalar parkında olub, işlərin gedişi ilə maraqlanıb.
Müəssisənin direktoru Elxan Hacıyev icra başçısına məlumat verərək bildirib ki, Zəyəm Texnologiyalar Parkı müxtəlif növ metal konstruksiyalar, o cümlədən fermalar, piyada keçidləri, metal körpü estakadaları, silolar, kalonlar və dayaqlar, bina fasadları üçün çərçivələr, müxtəlif növ beton qəliblər, üç və dörd gövdəli kotanlar, bina, tunel, yol tikintisində istifadə olunan texnikalar (kranlar, ekskavatorlar, qreyderlər, buldozerlər) üçün ehtiyat hissələri (vallar, oxlar, dişli çarxlar, muftalar, oymaqlar ) və s. istehsal edir. Müəssisə istehsal olunan məhsulların keyfiyyətinə nəzarət etmək üçün müasir standartlara cavab verən ən müasir laboratoriya avadanlıqları ilə təchiz edilib. 
Durektor əlavə edib ki, müəssisənin əsas vəzifələri mühüm əhəmiyyətli yerli və regional layihələrdə uğurla iştirak etməklə yanaşı, beynəlxalq miqyaslı inşaat-tikinti bazarında da rəqabətə davamlı transmilli korporasiya kimi fəaliyyətini davam etdirmək və daha da genişləndirməkdir. 
Müəssisə ilə yaxından tanış olan icra başçısı Rəşad Tağıyev bildirib ki, Şəmkir əhalisnin istehsal sahəsində məşğulluğunu artırmaq, eləcə də rayonda kənd təsərrüfatı ilə yanaşı, sənaye sahəsində çalışmaq istəyənlərin maraqlarının təmin edilməsi məqsədilə belə sənaye parkının olması sevindirici haldır: “Bundan sonra da Zəyəm Texnologiyalar Parkının Azərbaycan Respublikasının iqtisadi gücünün artırılması, sosial rifahın yaxşılaşdırılması yolunda Prezident İlham Əliyevin həyata keçirdiyi ardıcıl siyasətə öz dəstəyini verməsi və bu istiqamətdəki fəaliyyətini tam gücüylə davam etdirməsini arzulayıram”.Qabil YUSİFOĞLU
