“Heç özüm də bilmədim ki, bu hadisə necə baş verdi. Çox əsəbi idim, təzyiqim qalxmışdı. Nəvəmi məktəbdən gətirirdim. Kaş olmayaydı”. Bunu gununsesi.info-ya açıqlamasında paytaxtda motosiklet sürücüsünü döyən vəzifəli şəxs - Sultan Dadaşov yayılmış görüntülərinə münasibət bildirərkən deyib.
O bildirib ki, həmin an özündə olmayıb və işdən azad olunacağını da gözləyir: “Mən təəssüf edirəm. Nə qərar versələr, hazıram”.
Qeyd edək ki, Sultan Dadaşovun Prezident Administrasiyasında işlədiyi deyilir.
Senzor.az xatırladır ki, bundan əvvəl Daxili İşlər Nazirliyi Mətbuat Xidmətinin inspektoru, polis mayoru Anar Qafarov lent.az-a açıqlamasında yayılan görüntülərdən məlumatlı olduqlarını bildirmişdi. Onun sözlərinə görə, artıq yayılan görüntülərlə bağlı araşdırmalara başlanıb: “Hadisə araşdırıldıqdan sonra nəticəsi barədə ictimaiyyətə əlavə məlumat veriləcək”.
**22:14(25.04.2022)
Paytaxtda “Lexus” markalı avtomobilin sürücüsü motosikletçini döyüb.Oxu.Az xəbər verir ki, hadisə Mətbuat dairəsində qeydə alınıb.
Murad Salman adlı motosiklet sürücüsü ona yol verməyən “Lexus” sahibinə ani reaksiya verib.
Avtomobildən düşən şəxs M.Salmanı təhqir edərək onu döyüb.
Motosiklet sürücüsü bununla bağlı aidiyyəti qurumlara müraciət etdiyini bildirib.
