Şəmkir Rayon İcra Hakimiyyətinin başçısı Rəşad Tağıyev Zəyəm Cırdaxan kəndində sakinlərlə səyyar qəbul keçirib.Senzor.az bildirir ki, İcra başçısı görüşdən öncə Vətən müharibəsi və torpaqlarımızın müdafiəsi zamanı canından keçən kənd sakinlərinin məzarlarını ziyarət edib, qəbirləri üstünə gül–çiçək düzüb.
Sakinlərlə görüşdə rayon rəhbəri regionların sosial-iqtisadi inkişafına böyük diqqət yetirən dövlət başçısının hərtərəfli qayğısı sayəsində Şəmkir rayonunda aparılan abadlıq və yenidənqurma işləri haqqında vətəndaşlara məlumat verib. İcra başçısı bildirib ki, Zəyəm Cırdaxan kəndində bu günlərdə açılışı olan yeni məktəb binasının tikintisi, Şəmkir–Zəyəm–Düyərli–Zəyəm Cırdaxan–Tatarlı avtomobil yolunun müasir standartlara uyğun qurulması da görülən işlərin bir hissəsidir.
Rəşad Tağıyev ölkə rəhbəri tərəfindən həyata keçirilən bu tədbirlərin bundan sonra da davam etdiriləcəyini, vətəndaşları narahat edən ən kiçik problemin belə diqqətdən kənarda qalmayacağını vurğulayıb. Daha sonra fərdi şəkildə müraciət etmək istəyən sakinlər dinlənilib və qaldırdıqları məsələlər müvafiq qaydada qeydə alınaraq rəsmiləşdirilib.
Sakinlər tərəfindən edilən müraciətlər əsasən fərdi yaşayış evinin tikintisi üçün torpaq sahəsinin ayrılması, məşğulluq, eləcə də digər sosial müdafiə məsələləri ilə bağlı olub.
Qeyd edək ki, RİH başçısının rayonun kənd və qəsəbələrində səyyar görüşləri davam edir və bütün yaşayış məntəqələrində sakinlərlə görüşlərin keçirilməsi nəzərdə tutulur. Qabil YUSİFOĞLU
