Azərbaycan Milli Elmlər Akademiyasının (AMEA) sabiq prezidenti, fizika-riyaziyyat elmləri doktoru, professor, Əməkdar elm xadimi, akademik Eldar Salayevlə vida mərasimi keçirilib.
Senzor.az bildirir ki, mərasimdə elm və təhsil xadimləri, mərhumun dostları, ailə üzvləri, yaxınları və ictimaiyyət nümayəndələri iştirak ediblər.
Çıxış edənlər E.Salayevlə bağlı xatirələrini bölüşüblər, onun elm və təhsil sahəsindəki xidmətlərindən danışıblar.
Vida mərasimindən sonra mərhum II Fəxri xiyabanda torpağa tapşırılıb. 
**12:57
Azərbaycan Milli Elmlər Akademiyasının (AMEA) keçmiş prezidenti, fizika-riyaziyyat elmləri doktoru, akademik Eldar Salayev vəfat edib.
Senzor.az bildirir ki, o, ötən gün 89 yaşında dünyasını dəyişib.
Qeyd edək ki, Salayev Eldar Yunus oğlu 1933-cü ildə dekabrın 31-də Naxçıvan şəhərində anadan olub.
1970-1973-cü illərdə Azərbaycan Elmlər Akademiyasının Fizika İnstitutunda elmi işlər üzrə direktor müavini işləyib.
1972-ci ildə Azərbaycan Dövlət mükafatı laureatı adını, 1975-ci ildə fizika-riyaziyyat elmləri doktoru alimlik dərəcəsini alıb. 1979-cu ildən professor idi. 1980-ci ildə Elmlər Akademiyasının müxbir üzvü, 1983-cü ildə isə həqiqi üzvü seçilib. 1983-1997-ci illərdə Azərbaycan EA-nın prezidenti olub.
Akademik S.İ.Vavilov adına, H.Z.Tağıyev adına, N.Nərimanov adına mükafatlara layiq görülmüş, İslam Akademiyasının üzvü seçilmişdi.
E.Salayev 420 elmi əsərin və 88 ixtiranın və patentin, 4 monoqrafiyanın müəllifidir. “Qırmızı Əmək Bayrağı” ordeni və Azərbaycanın “Şöhrət” ordeni ilə təltif edilmişdi.
AMEA-dan verilən məlumata görə, Eldar Salayev II Fəxri xiyabanda dəfn olunacaq.
AMEA-dan onu da bildiriblər ki, dəfndən əvvəl mərhumla vida mərasimi keçiriləcək. Mərasimdə AMEA rəhbərliyi, elm və təhsil xadimləri, ictimaiyyət nümayəndələri iştirak edəcəklər.
