"Zəlzələyə görə təşvişə düşməyə ehtiyac yoxdur. Çünki bu gün baş verən zəlzələ güclü olmayıb".
Senzor.az xəbər verir ki, bunu AMEA nəzdində Respublika Seysmoloji Xidmət Mərkəzinin baş direktoru Qurban Yetirmişli bugünkü zəlzələ ilə bağlı keçirdiyi brifinqdə deyib.
Onun sözlərinə görə, qeydə alınan afterşoklar nəticəsində enerji boşalmaları gedib: "Bu da o deməkdir ki, yenidən həmin dərəcədə təkanlar gözlənilmir, günün sonuna qədər də azalmalar müşahidə olunacaq. Bu gün sadəcə bəzi ərazilərdə, əsas da çoxmərtəbəli yaşayış binalarında zəlzələ hiss olunub".
**12:28
Bu gün səhər saatlarında Azərbaycanda baş verən zəlzələ 50 saniyə davam edib.
Senzor.az xəbər verir ki, bunu AMEA nəzdində Respublika Seysmoloji Xidmət Mərkəzinin baş direktoru Qurban Yetirmişli bugünkü zəlzələ ilə bağlı keçirdiyi brifinqdə deyib.
Onun sözlərinə görə, zəlzələdən sonra 5 afterşok qeydə alınıb.
**09:42
AMEA nəzdində Respublika Seysmoloji Xidmət Mərkəzinin baş direktoru Qurban Yetirmişli zəlzələdən sonra afterşokların olacağını bildirib.
Senzor.az-ın məlumatına görə, o, KİV-ə açıqlamasında qeyd edib ki, ola bilsin bu afterşoklar hiss olunmasın.
Onun sözlərinə görə, bugünkü zəlzələ iyul ayında Xəzər dənizində baş verən ocaqda qeydə alınıb: "Zəlzələ həmin yerdədi, həmin qırılma boyudur. O vaxt da 6-7 afterşok olmuşdu. Heç biri də hiss olunmamışdı. Güclü zəlzələ gözlənilmir, əhali narahat olmasın".
Qeyd edək ki, dekabrın 7-də yerli vaxtla saat 08:16 Xəzər dənizində zəlzələ qeydə alınıb.
Yeraltı təkanlar 5,6 maqnitudada baş verib, zəlzələ ocağı 68 km dərinlikdə yerləşib.
Zəlzələ Xəzər dənizinə yaxın olan rayonlarda və Abşeron yarımadasında bəzi yerlərdə 5 bal, bəzi yerlərdə isə 3 bala qədər hiss olunub. Zəlzələnin episentri Siyəzən stansiyasından 60 km şərqdə Xəzər dənizində olub.
