NATO-ya üzvlük haqlarını ödəmək istəməyənlər müttəfiqləri tərəfindən  müdafiə olunmayacaqlar.

Senzor.az yerli KİV-ə istinadən bildirir ki, bunu ABŞ-ın sabiq prezidenti Donald Tramp Cənubi Karolinada tərəfdarları qarşısında çıxış edərkən deyib. 

“Böyük bir ölkənin prezidentlərindən biri mənə dedi: “Əgər biz pul verməsək və Rusiya bizə hücum etsə, sən bizi qoruyarsan?” Dedim: “Ödəməmisiniz. Deməli, ödənişi gecikdirirsiniz?” Yox, mən onları müdafiə etməzdim. Üzvlər üzvlük haqlarını ödəməlidirlər”, - Tramp bildirib.

Xatırladaq ki, Şimali Atlantika Alyansı 1949-cu ildə Sovet İttifaqına qarşı kollektiv mübarizə aparmaq üçün yaradılıb. Razılaşmanın əlamətdar xüsusiyyəti ondan ibarətdir ki, bir NATO üzvünə hücum hamıya-bütün müttəfiqlərə hücum hesab olunur.

Tramp uzun müddətdir ki, NATO-dan narazılığını bildirir və üzv dövlətlərin başçıları ilə mübahisə edir, üzv ölkələrin ümumi daxili məhsulunun 2%-ni müdafiəyə xərcləmələrini istəyir, əks halda ABŞ-ı blokdan çıxaracağı ilə hədələyir.

Yeri gəlmişkən, keçən il dərc olunan hesabatda o vaxtkı 30 üzv ölkədən yalnız 11-nin müdafiəyə ÜDM-nin 2%-ni və ya daha çoxunu xərclədiyi məlum olub.