Beynəlxalq Cinayət Məhkəməsinin (BCM) İlkin İcraat Palatası Əfqanıstanda hakimiyyətdə olan "Taliban" hərəkatının lideri Heybətullah Axundzadə və ölkənin Ali Məhkəməsinin sədri Əbdül Hakim Həqqaninin həbsinə order verib.
Senzor.az bildirir ki, BCM-nin bəyanatında belə deyilir.
Məhkəmə hesab edir ki, onlar davranışları "Taliban"ın gender siyasətinə uyğun gəlməyən qadınların təqibinə görə məsuliyyət daşıyırlar.
Bəyanatda bildirilir ki, "Taliban" qızları və qadınları təhsil və şəxsi toxunulmazlıq, hərəkət azadlığı, düşüncələrini ifadə etmək hüquqlarından məhrum edib.
BCM-nin prokurorları hesab edirlər ki, "Taliban"ın dövlət siyasəti, "qətllərə, həbslərə, işgəncələrə, zorlamalara və oğurlanmalara" məruz qalan Əfqanıstanın mülki əhalisinin əsas hüquq və azadlıqlarının ciddi şəkildə pozulmasına gətirib çıxarıb.
