Sərdar Süleyman oğlu Səfərov Strateji Obyektlərin Mühafizəsi Dövlət Agentliyinin rəisi təyin edilib.
Senzor.az bildirir ki, Prezident İlham Əliyev bu barədə Sərəncam imzalayıb.
Dövlət başçısının digər Sərəncamı ilə Sərdar Səfərova “general-mayor” ali hərbi rütbəsi verilib.
Qeyd edək ki, daha öncə polis general-mayoru olan Sərdar Səfərov 2023-cü ildə Xankəndi şəhərinə komendant təyin edilmişdi. O, 1973-cü ildə Sumqayıtda anadan olub. Dövlət Bədən Tərbiyəsi İnstitutunu, Türkiyənin Jandarma Zabitlər Məktəbini və DİN-in Polis Akademiyasını bitirib. 1996-2005-ci illərdə Daxili Qoşunlarda xüsusi təyinatlı bölüyün komandiri, Xüsusi təyinatlı taborun qərargah rəisi kimi xidmət edib. 2019-2022-ci illərdə Bakı Şəhər Baş Polis İdarəsinin İctimai Təhlükəsizlik İdarəsinin rəis müavini və həmin İdarənin rəisi olub. Daha sonra BŞBPİ rəisinin xidmət üzrə müavini vəzifəsinə təyin edilib. O, Xankəndiyə komendant təyin edilməzdən öncə Daxili İşlər Nazirliyi Baş İctimai Təhlükəsizlik İdarəsinin rəisi vəzifəsində çalışırdı. Ailəlidir, üç övladı var.
