Roma Papası XIV Leo ABŞ Prezidenti Donald Trampın Avropa ilə bağlı son açıqlamalarını tənqid edib.

“Sky News” nəşri xəbər verir ki, Pontifik ABŞ-ın təklif etdiyi “sülh planı”nın Ukrayna üçün nə dərəcədə ədalətli olduğuna dair sualı cavablandırarkən Trampın son bəyanatlarını xatırladıb.

“Təəssüf ki, bu planın gördüyüm bəzi hissələrinin uzun illərdir Avropa və ABŞ arasında real müttəfiqliyi əhəmiyyətli dərəcədə dəyişdirdiyini düşünürəm. Həmçinin son müsahibələrdə də Avropa ilə bağlı səsləndirilən şərhlər, məncə, bu gün və gələcəkdə lazım olan çox vacib bir ittifaqı parçalamaq cəhdidir”, - Papa XIV Leo deyib.

Pontifikin sözlərinə görə, Tramp administrasiyasının Avropaya və onunla münasibətlərə öz baxış hüququ var, lakin ABS da daxil olmaqla, əksər ölkələrdə “başqa cür düşünən” çoxlu insanlar da var.

Yeri gəlmişkən, XIV Leo bu sözləri İtaliyada Ukrayna Prezidenti Volodimir Zelenski ilə görüşündən sonra deyib.

Azvision.az xatırladır ki, dekabrın 9-da ABŞ Prezidenti Donald Tramp Avropa Komissiyasının (AK) amerikalı milyarder İlon Maskın “X” sosial şəbəkəsini 120 milyon avro məbləğində cərimələmək qərarını tənqid edib. Amerika lideri Avropanın yanlış istiqamətdə getdiyini və AK-ın qərarının olduqca qəribə olduğunu vurğulayıb.