ABŞ Prezidenti Donald Tramp vəzifəsinin ilk ilində 8 müharibəyə son qoyduğunu iddia edir. Lakin onun bəzi sülh müqavilələri əsasən təsirsiz olub.

Almaniyanın “Deutsche Welle” nəşrində dərc olunan yazıda belə deyilir.

Qeyd olunur ki, Trampın müharibələrə son qoymaq və asayişi bərpa etmək barədə ritorikası "tüstü və güzgü" kimi görünür.

Nəşrin məlumatına görə, Tramp administrasiyasının həllinə kömək etdiyini iddia edə biləcəyi yeganə münaqişə Ermənistan və Azərbaycan arasındakı mübahisədir və burada ABŞ-ın fəal iştirakı təxminən 40 illik gərginliyə faktiki olaraq son qoyub.

"Onun sülh adlandırdığı şey əsasən müvəqqəti fasilələrdən, tənzimləyici razılaşmalardan və ya münaqişənin kök səbəblərini nəzərə almayan mətbuat konfransı qələbələrindən ibarət olub", - deyə ABŞ-da yerləşən müharibə əleyhinə qrup Code Pink-in təsisçisi Medea Benjamin “Deutsche Welle” nəşrinə verdiyi müsahibədə bildirib. O vurğulayıb ki, “Bunlar uzunmüddətli sülh müqavilələri deyil, müharibənin yenidən başlamasının qarşısını almaq əvəzinə, onu gecikdirən qısamüddətli siyasi qərarlardır".