Almaniya Kansleri Fridrix Merts Ukraynanın 2027-ci il yanvarın 1-nə qədər Avropa İttifaqına (Aİ) daxil olmasını qeyri-mümkün hesab edir.
Bu barədə "Die Zeit" qəzeti məlumat yayıb.
Kanslerin sözlərinə görə, Aİ-yə üzv olmaq istəyən hər bir ölkə Kopenhagen meyarlarına cavab verməlidir ki, bu da adətən bir neçə il vaxt aparır.
Eyni zamanda, F.Merts vurğulayıb ki, Ukrayna Aİ üzvlüyünə yol açan perspektivə malik olmalıdır.
"Biz Ukraynanı tədricən Avropa İttifaqına yaxınlaşdıra bilərik. Belə bir yol həmişə mümkündür, lakin tez bir zamanda üzvlük real deyil", - o bildirib.
Bundan başqa, Kansler Ukrayna müharibəsi ilə bağlı Rusiya Prezidenti Vladimir Putinlə Almaniya arasında birbaşa danışıqların aparılmasına dair çağırışları rədd edib.
"Danışıqlar Ukrayna və Rusiya arasında aparılmalıdır. Biz burada vasitəçi kimi çıxış etmirik", - o deyib.
