Ermənistanda hökumət əleyhinə növbəti dəfə etiraz aksiyası keçirilib.
Senzor.az yerli KİV-ə istinadən bildirir ki, İrəvanın Respublika meydanında toplaşan bir neçə yüz müxalifət fəalı baş nazir Nikol Paşinyanın istefasını tələb edib.
Aksiyanın təşəbbüskarı, Ermənistanın Polşadakı keçmiş səfiri Edqar Qazaryanın sözlərinə görə, müxalifətçilər Paşinyanla görüş keçirmək niyyətindədirlər. Lakin onları hökumət binasına buraxmayıblar: “Gündəlikdə yalnız bir məsələ var - onun istefası. Məndə elə təəssürat yaranıb ki, o, hökumət binasında deyil, amma eybi yoxdur, bura gələ bilər. Vergi ödəyiciləri onun üçün 2 milyon dollarlıq avtomobil alıblar, onun vertolyotu da var. Onlardan istifadə etsin və bizimlə görüşə hökumət binasına gəlsin”.
Meydana toplaşanlar hökumət əleyhinə şüarlar səsləndiriblər. Polis yüksək hazırlıq vəziyyətinə gətirilib. Hökumət binasının qarşısında kordon qurulub.
