Avropa Parlamentində (AP) Azərbaycana qarşı sanksiya çağırışları səslənir. Hətta artıq bununla bağlı qətnamə də qəbul edildi. Lakin nə bu günə qədər qəbul edilən qətnamələrin, nə də bundan sonrakıların Bakının nəzərində heç bir əhəmiyyəti yoxdur.
AP-də təmsil olunan deputatların əksəriyyəti tərəfli yanaşma sərgiləyir. Yenə bir çoxu erməni lobbisi və diasporunun əlində marionetə çevrilib.
Avropa Parlamenti yeni seçkilərə hazırlaşdığı bir zamanda Azərbaycana qarşı çağırışların edilməsi təsadüfi deyil. Aydın məsələdir ki, erməni lobbisinin pulu ilə yenidən seçilmək istəyən deputatlar məhz buna görə aktivləşib, Azərbaycanı hədəf seçiblər.
Erməni lobbisi və diasporundan söz düşmüşkən, bir şəxs daha çox diqqət çəkir. Bu maliyyələşmənin arxasında Brüsseldə yaşayan erməni əsilli qanlı brilyant qaçaqmalçısı Kaspar Karapetyan dayanır.
Belə ki, Avropa İttifaqı-Ermənistan dostluq qrupu Ədalət və Demokratiya uğrunda Ümumavropa Erməni Federasiyası (EAFJD) təşkilatı ilə sıx bağlıdır. Kaspar Karapetyan isə bu təşkilatın prezidentidir.
Kaspar Karapetyan AP-nin bir sıra deputatlarını sanki dirijor çubuğu ilə idarə edir. Misal üçün, K.Karapetyan Avropa Parlamentində və Aİ-dəki bəzi rəsmiləri maliyyələşdirərək onların əli ilə Aİ-nin Rusiyanın brilyant biznesinə sanksiya tətbiqinə mane olur. Onu da qeyd edim ki, almazlar Rusiyadan Belçikaya gətirilir, orada cilalanır və satılır. Ermənistandan da almazlar eyni qaydada Belçika vasitəsilə cilalanıb satılır. Karapetyanın biznesi məhz bunun üzərində qurulub və AP deputatlarına verilən rüşvətin mənbəyi budur.
Karapetyanın brilyant biznesindən qazandığı çirkli pullar bəzi deputatların gözlərini qamaşdırır. Bu mənada Ermənistanın və erməni lobbisinin “konyak diplomatiyası”ndan gen-bol faydalanan Avropa Parlamentinin deputatları Azərbaycanı hədəf alır.
Aydın məsələdir ki, Azərbaycanın Avropa Parlamenti qarşısında heç bir öhdəliyi yoxdur. Buna görə də həmin qətnamələr nəzərimizdə əhəmiyyət daşımır. Məsələyə sadəcə “it hürər, karvan keçər” məsəli ilə yanaşmaq lazımdır.
Turan Rzayev,
politoloq
